An ceto mutane biyu da rai bayan sun shafe kwanaki tara a wani ramin samar da wutar lantarki a Nepal

By ttnhausa@gmail.com Last updated Sep 4, 2026

Ambaliyar Nepal — Wasu ƴan’uwa na makoki a lokacin da ake gudanar da **bikin ƙona gawarwaki ‘na alama’ na wasu mutane huɗu daga cikin iyalan Magar da har yanzu ake neman su, bayan ambaliyar ruwa ta kwashe su. An yi amfani da siffofin mutane da aka ƙera da ciyawar Kush wajen gudanar da bikin a Ɗakin Bauta na Pashupatinath, a Kathmandu, Nepal, ranar 2 ga Satumba, 2026. Hoto: Ezra Acayan/Getty Images

Masu aikin ceto sun samu ma’aikata biyu a ramin tashar samar da wutar lantarki bayan bala’in dusar ƙanƙara da laka

Masu aikin ceto a Nepal sun ceto mutane biyu da rai daga wani rami da ke da alaƙa da tashar samar da wutar lantarki a Kogin Trishuli, kwanaki tara bayan wata gagarumar kwararar ƙanƙara, duwatsu da laka ta mamaye kwarin, inda mutane sama 1,300 suka rasu tare da ɓacewar dubban wasu.

A cewar Reuters, ma’aikatan biyu, Kabir Maharjan da Sanjay Sah, an ceto su daga Upper Trishuli 3A Hydropower Station yau Juma’a.

Su ne mutanen farko da aka ceto daga ramukan da ke da alaƙa da tashoshin samar da wutar lantarki tun bayan bala’in, kuma an kai su wani asibitin sojoji da ke Kathmandu, babban birnin Nepal.

Jami’ai da masu aikin ceto sun yi imanin cewa rushewar wata dusar ƙanƙara a ranar 26 ga Agusta a saman kogin ya jefa aƙalla mutane 900 cikin ramukan da ke da alaƙa da ayyukan samar da wutar lantarki guda shida.

Hotunan bidiyo da hukumomin Nepal suka fitar sun nuna yadda aka ɗaga Maharjan daga wani rami da ke cikin ƙasa yayin da mutane ke murna. An kuma fitar da Sah ta hanyar ɗauke shi a bayan wani ma’aikaci, jikinsa cike da laka, kafin likitocin sojoji su sanya masa abin rufe fuska na iskar oxygen tare da duba yanayinsa.

Sah, wanda ke aiki a matsayin mechanical foreman, ya ce ya zauna a ɗakin kula da na’urori domin taimaka wa wasu ma’aikata su tsira bayan ya ji labarin bala’in.

“Ina cikin ɗakin kula da na’urori, don haka alhakin da ke kaina shi ne ceto rayukan kowa. Lokacin da irin wannan babban bala’i ya faru, bai dace in gudu ni kaɗai ba,” in ji shi a wani faifan bidiyo da hukumomin Nepal suka wallafa.

Sah ya shaida wa masu ceto cewa ya shafe wani lokaci yana karanta mantras, wato ayoyin addu’a, yayin da yake cikin ramin.

Ya ce yana da alaƙa da wasu mutane uku ko huɗu a cikin ramin, kuma akwai yiwuwar wasu mutane har yanzu suna raye a cikin sassan da ke da zurfi.

Hukumar kula da bala’o’i ta Nepal ta bayyana a ranar Juma’ar nan cewa, aƙalla mutane 1,287 ne suka mutu sakamakon ambaliyar ruwa da ta tafi da gidaje, tituna da makarantu a garuruwa da ƙauyuka da ke kusa da iyakar China da Tibet.

Fiye da mutane 5,080 ne har yanzu ba a san inda suke ba, a cewar hukumar.

China ta ce mutanenta 21 sun mutu a Tibet, yayin da wasu 541 ke cikin jerin mutanen da suka ɓace.

Ceton da aka bayyana a matsayin karama

Dukkan mutanen biyu suna samun kulawa a sashen kula da marasa lafiya masu tsanani a wani asibitin sojoji, inda aka ce alamomin lafiyarsu suna cikin kwanciyar hankali, a cewar wani jami’in asibitin da Reuters ta ambata.

An ce Maharjan ba zai iya motsa hannayensa ko ƙafafunsa ba, yayin da raunin Sah ba a ɗauke shi a matsayin mai tsanani ba, a cewar wani mataimaki ga Ministan Makamashi na Nepal.

Amir Maharjan, ɗan’uwan Kabir, ya ce iyalinsu ba su samu tabbacin hukuma ba, amma an faɗa musu su je asibitin.

“Na ji daga labarai cewa an gano ɗan’uwana. Dukkan iyalinmu suna cikin farin ciki,” in ji Amir.

Wasu mutane kaɗan sun kuma samu damar tserewa daga wani rami sa’o’i bayan bala’in ya faru.

Wata ƙungiyar ƙwararru a wani rukunin WhatsApp na taimaka wa masu aikin ceto wajen gudanar da bincike a wuraren tashoshin samar da wutar lantarkin.

Hukumomin Nepal suna amfani da jirage masu sauƙar ungulu da manyan injuna wajen ci gaba da aikin ceto.

Sojojin Nepal sun ce ana ci gaba da gudanar da aikin bincike da ceto a yankin Upper Trishuli 3A.

Sojoji da ƴan sanda ne ke jagorantar aikin, tare da taimakon ƙwararru daga India, Koriya ta Kudu da China.

Asarar da bala’in ya haddasa ta kai dala biliyan 2.56

Dharma Raj Upreti, shugaban Hukumar Kula da Rage Haɗarin Bala’o’i ta Nepal, ya ƙiyasta cewa kadarori, gidaje da ababen more rayuwa da darajarsu ta kai aƙalla rupee biliyan 387.5 na Nepal, wato dala biliyan 2.56, sun lalace.

Upreti ya ce Nepal na buƙatar sake gina kusan gidaje 20,000 a yankunan da ambaliyar ta shafa, yayin da aƙalla gidaje 7,500 suka lalace gaba ɗaya.

Wani babban jami’i a ɗaya daga cikin manyan kamfanonin inshora na Nepal ya ƙiyasta cewa asarar da kamfanonin inshora za su iya fuskanta za ta iya haura ta dala miliyan 132.3, inda ayyukan samar da wutar lantarki za su kasance mafi yawan abubuwan da za a nemi diyya a kansu.

Nepal a ranar Alhamis, ta ce aƙalla ƴan ƙasashen waje 583 sun ɓace, yawancinsu mahajjata da masu yawon buɗe ido masu zuwa wuraren tafiye-tafiye na tsaunuka.

Ƙwararrun aikin ceto daga Australia sun isa Nepal ranar Juma’a domin shiga aikin neman waɗanda suka tsira, yayin da gwamnatin Australia ta bayyana “tsananin damuwa” kan halin da Ƴan ƙasarta 36 da suka ɓace ke ciki.

Ceton Maharjan da Sah ya ƙara wa masu aikin ceto ƙwarin gwiwa, duk da cewa yiwuwar samun ƙarin waɗanda suka tsira na raguwa yayin da aikin neman mutanen ke shiga mako na biyu.